አቶ በረከት ስምኦን ባለስልጣኖች አቶ መለስ ዜናዊን አርዓያ በማድረግ ተከትለው እንዲሄዱ ተማጸኑ

ነሀሴ ፲፯ (አስራ ሰባት) ቀን ፳፻፬ ዓ/ም

ኢሳት ዜና:-አቶ በረከት ዛሬ በሰጡት ጋዜጣዊ መግለጫ “በሀይወት ዘመናቸው አቶ መለስ የያዙት  ዓላማ የጥቂቶች ዓላማ ከሆነ ሞት ነበር ” ብለዋል ።

የመንግስትና የኢህአዴግ አመራርም የህዝቡን መልዕክት ተቀብለን ጠቅላይ ሚኒስትሩን አርዓያ አደርገን ለመከተል ወስነናል የሚሉት አቶ በረከት፤ ሌሎች ባለስልጣኖችና የኢህአዴግ አመራር አካላት፣ ህዝቡ እና የአለማቀፉ ማህበረሰብ ከጎናቸው እንዲቆም ተማጽነዋል።

ኢሳት በትንናት ዘገባው አንድ የብአዴን ከፍተኛ ባለስልጣንን በምንጭነት በመጠቀም ፣ የኢህአዴግ ባለስልጣናት በአቶ መለስ ሞት የህዝብ ድጋፍ ለማግኘት ስትራቴጂ መንደፉቸውን መግለጻችን ይታወሳል። የኢህአዴግ   ስልት ህዝቡ በየወረዳዎች በተዘረጋው ድንኳን እየወጣ ለአቶ መለስና ለኢህአዴግ ያለውን ድጋፍ እንዲገልጽና ስሜታቸው የተዳከመውን የመንግስት ባለስልጣናት እና የኢህአዴግ ካድሬዎችን እንዲያበረታታ ማድረግ ነው።

አቶ በረከት “በ መለስ አጥንት” በማለት ዛሬ ለባለስልጣኖቹና ለህዝቡ ያቀረቡት ጥሪ በኢህአዴግ ውስጥ የተፈጠረውን መከፋፈል እና ውጥረት እንደሚያሳይ ነው ታዛቢዎች የሚናገሩት።

ተወዳጁ ጋዜጠኛ ተመስገን ደሳለኝ ቃሊቲ እስር ቤት ተወሰደ!

የፍትህ ጋዜጣ አዘጋጅ ተመስገን ደሳለኝ ባለፈው ሳምንት ውስጥ ፍርድ ቤት ቀርቦ እንደነበር ይታወቃል። በቀረበበትም እለት በርካታ አድናቂዎቹ እና የፍትህ ጋዜጣ አንባቢ ወዳጆች ፍርድ ቤቱን አጨናነቀውት የነበረ ቢሆንም ዳኛ አልተሟላም በሚል ሰበብ ለዛሬ ነሐሴ 16/2004 ዓ.ም  ተቀጥሮ ነበር።

በዛሬው እለት የተመስገንን ክስ የተመለከተው ፍርድ ቤቱ ጋዜጠኛው የተከሰሰበት ወንጀል ዋስትና አያሰጥም በሚል ወደ ወደ ቃሊቲ እስር ቤት እንዲወሰድ እና በቀጣይ ነሀሴ 28/ 2004 ዓ.ም እንዲቀርብ ቀጠሮ ሰጥቷል።

አቃቤ ህግ “ፍትህ ጋዜጣ ትታገድልኝ” ሲል ኮሚክ የሆነ ጥያቄ ፍርድ ቤቱን የጠየቀ ሲሆን፤ ጋዜጣዋ ከአንድ ወር በፊት የጠቅላይ ሚኒስትሩን በጠና መታመም ብሎም “ሞተዋል” የሚለውን ጭምጭምታ ከተለያዩ ምንጮች ጠቅሳ ልታትም ስትል ተገኝታለች በሚል መታገዷ ከዛ በኋላም  ታትማ እንደማታውቅ አቃቤ ህግም ተመስገንም ዳኛውም እኛም እናውቃለን!
በመጨረሻም አስተያየት ተመስገን ደሳለኝ በፍትህ ጋዜጣ ላይ ጠቅላይ ሚኒስትሩ መታመማቸውን እና ሞቱ የሚባል ጭምጭምታም እንዳለ ሲዘግብ ወደ ቃሊቲ እስር ቤት ተወሰደ። ጋዜጣውም ታገደ። ታድያ፤ ከትላንት ወዲያ በጠዋቱ የጠቅላይ ሚኒስትሩን መሞት መርዶ ነግሮን እስከ አሁንም ድረስ በዋሽንት እንጉርጉሮ እንባ የሚያራጨን ኢቲቪስ ማነው የሚያስረው!?
ኧረ የፍትህ ያለ!  ብንል የሚሰማን ይኖር ይሆን!?

አልሸባብ እና ግብፅ ሆይ፤ የሞቱት መለስ እንጂ ኢትዮጵያ እንዳልሆነች ኮስተር ብዬ እነግራችኋለሁ። ....... ከአቤ ቶክቻው

የጠቅላይ ሚኒስትሩን መሞት ቀድመው የተረዱት የግብፅ ባለስልጣናት “ከቀጣዩ መንግስት ጋር በአባይ ጉዳይ ላይ መግባባት ይኖረናል ብለን እናስባለን!” ሲሉ በደስታ መናገራቸውን ሰምተናል።

አሁን በቅርቡ ደግሞ አልሸባብ ሆዬ በጠቅላይ ሚኒስትሩ ሞት መደሰቱን ገልፆ ከዚህ በኋላ በእርግጠኝነት ኢትዮጵያ ትበታተናለች ሲል “ቅዠቱን” ጮቤ እየረገጠ ሲነግረን፤ መቼም ጆሮ አልሰማ አይልምና አድምጠናል።

ይሄ ስለ ኢትዮጵያውያን ማንነት ጠንቅቆ ካለመረዳት የመጣ የግንዛቤ ችግር የፈጠረው ፈንጠዝያ ነው።

እርግጥ ነው ባለፉት ግዜያት በተለይም አንዳንድ የኢህአዴግ ዋና ካድሬዎች የአቶ መለስን ስዕል ከኢትዮጵያችንም በላይ አጉልተው ለማሳየት መከራቸውን ሲያዩ እኛም “ተዉ ይሄ ነገር ጥሩ አይደለም” እያልን በመምከር አበሳችንን ስናይ ከርመናል።

የጠቅላይ ሚኒስትር መለስ ዜናዊ በሞት መለየታቸውን ተከትሎ የተለያዩ አስተያየቶች እየተንጸባረቁ ነው

ነሀሴ ፲፭ (አስራ አምስት) ቀን ፳፻፬ ዓ/ም

ኢሳት ዜና:-ኢሳት ከሳምንታት በፊት  ከዓለማቀፉ ግጭት ተንታኝ ቡድን ውስጥ ያሉ ምንጮቹን በመጥቀስ ጠቅላይ ሚኒስትር መለስ ዜናዊ ማረፋቸውን ይፋ ቢያደርግም፤ የመንግስት ኮሙኒኬሽን ሚኒስትሩን አቶ በረከት ስምዖንን ጨምሮ የተለያዩ የመንግስት ባለስልጣናትና  በአገር ቤት የሚታተሙ አንዳንድ ጋዜጦች አቶ መለስ በቅርቡ ሥራ ለመጀመር በሚያስላቸው  ጥሩ የጤንነት  ሁኔታ ላይ እንደሚገኙ ሲገልፁ ቆይተዋል።

አቶ መለስ አርፈዋል፤አላረፉም የሚለው እሰጥ እገባ ባየለበት ሰዓት ሌላ አስደንጋጭ ዜና ተሰማ። አምስተኛው የኢትዮጵያ ኦርቶዶክስ ተዋህዶ ቤተ-ክርስቲያን ፓትርያርክ ብጹዕ ወቅዱስ አቡነ-ጳውሎስ  በድንገት  የማረፋቸው ዜና።

የፓትርያርኩ ዕረፍት  በተገለጸ በ አራተኛው ቀን እነሆ ዛሬ ማለዳ የ ኢትዮጵያ ቴሌቪዥን  ላለፉት 21 ዓመታት ኢትዮጵያን ሲመሩ የነበሩት ጠቅላይ ሚኒስትር መለስ ዜናዊ ማረፋቸውን በይፋ አውጀ። አቲቪ በዚሁ የዜና እወጃው ምክትል ጠቅላይ ሚኒስትሩ እና የውጪ ጉዳይ ሚኒስትሩ አቶ ሀይለማርያም ደሳለኝ  አቶ መለስን ተክተው በጠቅላይ ሚኒስትርነት እንደሚቀጥሉም አስታውቋል። እንደ ኢቲቪ ዘገባ፤ አቶ መለስ ያረፉት ትናንት ምሽት ነው።

ተቃዋሚዎች ያለፈው የግፍ ስርአት ተመልሶ የማይመጣ መሆኑን በትግላችን የምናሳይበት ውቅት ላይ እንገኛለን ሲሉ ዶ/ር ብርሀኑ ነጋ ገለጡ

ነሀሴ ፲፭ (አስራ አምስት) ቀን ፳፻፬ ዓ/ም
ኢሳት ዜና:-የግንቦት 7 ንቅናቄ መሪ የሆኑት ኢኮኖሚስቱ ዶ/ር ብርሀኑ ነጋ ከኢሳት ጋር ባደረጉት ቃለምልልስ፣ የመለስ ዜናዊ ዜና እረፍት በግላቸው ስለፈጠረባቸው ስሜት እና በአገሪቱ ላይ ሊያመጣ ስለሚችለው መጥፎ ወይም ጥሩ አጋጣሚ ተናግረዋል
የተለያዩ ሀይሎች እጃቸው ላይ ያለውን ካርድ የሚጫወቱበት መንገድ የኢትዮጵያን እጣ ፋንታ እንደሚወስን ዶ/ር ብርሀኑ ተናግረዋል::
በኢትዮጵያ ውስጥ አሁን የሚታየውን የስልጣን ክፍተት ተከትሎ አገሪቱ ወደ መጥፎ ጎዳና እንዳታመራ ግንቦት7 ምን አማራጮችን ያቀርባል ለተባሉት ፣ ድርጅታቸው ሲመሰረት ጀምሮ አማራጮችን ግልጽ ማድረጉን ገልጠዋል::
ድርጅታቸው ግንቦት7፣ በኢትዮጵያ ውስጥ የስልጣን ክፍተት ቢፈጠር መላውን የኢትዮጵያ ህዝብ አስተባብሮ አመራር ለመስጠት ተቋማዊ ብቃቱ ምን ይመስላል ለተባሉት ዶ/ር ብርሀኑ ሲመልሱ፣ ግንቦት7 በአለፉት 4 አመታት ድርጅታዊ ብቃቱን ማጎልበቱን በሙሉ ልብ ተናግረዋል::

የፌደራል እና የመከላከያ ፖሊስ አባላት በከተሞች ጥብቅ ቅኝት እያደረጉ ነው