የኢትዮጵያ መንግስት የኢንተርኔት አፈናውን መቀጠሉን ሪፖርተርስ ዊዝ አውት ቦርደርስ አስታወቀ

ሰኔ ፪ (ሁለት) ቀን ፳፻፬ ዓ/ም
ኢሳት ዜና:-ድርጅቱ እንደገለጠው የኢትዮጵያ መንግስት የኢንትርኔት ተጠቃሚዎች ስማቸውን ሳይገልጡ የሚጠቀሙበትን እና እንዳይታዩ የታገዱ ድረገጾችን ለማየት የሚጠቅመውን ቶር ኔት ወርክ ዘግቷል።
ሪፖርተርስ ዊዝ አውት ቦርደርስ  ማተሚያ ቤቶች አዲስ ያወጡትን ቅድመ ምርምራን የሚያጠናክረውን ውልም ተችቶአል።
ፓርላማው በቅርቡ አዲስ የወጣውን የቴሌኮሚኒኬሽን ህግ ማጽደቁ ይታወሳል።
በአዲሱ ህግ ከየቴሌኮሚኒኬሸን መሳሪያዎች ጋር የተያያዙ ወንጀሎች  ከ10-15 ዓመታት በሚደርስ ጽኑ እሥራትና ከ100ሺ እስከ 150ሺ ብር የሚደርስ የገንዘብ መቀጮ የሚያስቀጣ ነው ተደንግጓል፡፡
የቴሌኮሚኒኬሸን አገልግሎት ከመስጠት ወንጀል ጋር ማለትም ሕጋዊ ንግድ ፈቃድ ሳይኖር የቴሌኮሚኒኬሸን አገልግሎት መስጠትም  ቅጣት ከሚያስከትሉት አንዱ መሆኑን ረቂቅ አዋጁ ያትታል።
የቴሌኮም ማጭበርበር ተግባር ህገወጥ መሳሪያ በመጠቀም ወይም ህገወጥ የቴሌኮም አገልግሎት በመስጠት ብቻ ሳይሆን ህጋዊ መሳሪያዎችንና አገልግሎቶችን በመጠቀምም ሊፈጸም እንደሚችል የሚያትተው ይኽው ረቂቅ አዋጅ በአጥፊዎች ላይ ከ3-8 ዓመታት እሥራትና ከብር 30ሺ እስከ 80ሺ  የሚደርስ መቀጮ ይደነግጋል፡፡
የቴሌኮሚኒኬሸን አገልግሎት ዋጋና ታሪፍ ማጭበርበርም እንዲሁ ቅጣትን የሚያስከትል ነው፤ ወንጀሉም  ከ5-10 ዓመታት የሚደርስ ጽኑ እሥራትና አገልግሎት ሰጪ ድርጅቱ የደረሰበትን ኪሳራ ሶስት እጥፍ የገንዘብ መቀጮ የሚያስቀጣ ሆኖ ተደንግጓል፡፡
በዚህ የወንጀል ድርጊት የተከሰሰም ከ10-20 ዓመታት እሥራትና በዚሁ ሕገወጥ አገልግሎት የተገኘው ገቢ እስከ አሥር እጥፍ የሚደርስ መቀጮ የሚያሰቀጣ ሲሆን የዚህ ሕገወጥ አገልግሎት ተጠቃሚዎች ደግሞ ከሶስት ወራት እስከ ሁለት ዓመት እስራትና ከ2 ሸ500 ብር እስከ 20ሺብር መቀጮን ይጥላል፡፡
የኮልባክ አገልግሎትን የሚመለከቱ ወንጀሎች ማለትም የሃገር ውስጥ የቴሌኮሚኒኬሸን ድርጅት ሳያውቀው የሌላን ሃገር የቴሌኮሚኒኬሸን ድርጅት የጥሪ ቶንን ለዓለምአቀፍ ግንኙነት መጠቀም ከ3 ወራት እስከ 2 ዓመታት እሥራትና ከብር 2 ሺ500 እስከ 20 ሺ ብር መቀጮ የሚያስቀጣ ሆኖ በረቂቅ አዋጁ ተደንግጓል፡፡
ረቂቅ አዋጁ ሌሎች ወንጀሎች ሲል የገለጻቸው ማለትም ሲም ካርድ፣የደንበኞች መለያ ቁጥር ወይንም ኮድ እና ሌሎች የቴሌኮሚኒኬሸን መሳሪያዎችን በህገወጥ መንገድ ማባዛት፣አስመስሎ መሥራት እንዲሁም በማናቸውም ዓይነት ወይም በሌላ ማናኛውም መንገድ በመጠቀም በሕዝብ ቴሌፎን አማካይነት ሊገኝ የማይችልን  አገልግሎት ለማግኘት የሚያስችል ማንኛውም ሕገወጥ ድርጊት መፈጸም ከባድ ቅጣትን እንደሚያሰከትል ደንግጓል፡፡  የኢትዮጵያን መንግስት መልካም ምስል በኢንተርኔት በሚያበላሹት ላይም ቅጣት ይጣልባቸዋል።

ለአባይ ግድብ ማሰሪያ ያለፈቃዳቸው ደሞዛቸው የተቆረጠባቸው እና ተቃውሞ ያሰሙ ኢትዮጵያውያን አስፈላጊው የማስተካከያ እርምጃ እንዲወሰድባቸው ተባለ

ሰኔ ፪ (ሁለት) ቀን ፳፻፬ ዓ/ም

ኢሳት ዜና:-ስማቸው እንዳይጠቀስ የፈለጉ የደቡብ ተወላጆች  ለኢሳት እንደገለጡት ያለፈቀዳቸውን ለህዳሴ ግድብ ማሰሪያ  በሚል የተቆረጠው ገንዘብ እንዲመለስላቸው በመጠየቃቸው ነው አስፈላጊው እርምጃ እንዲወሰድባቸው የሚል ደብዳቤ የደረሳቸው።
” የህዳሴን ግድብ ገንዘብ አሰባሰብን ይመለከታል”   በሚል ርእስ በተጻፈው ደብዳቤ ላይ ለግድቡ አናዋጣም ባሉት ላይ አስፈላጊው የማስተካከያ እርምጃ የሚወሰደው ጸረ ልማት ሀይሎች ተብለው በመፈረጃቸው  ነው።
“መንግስት” ይላል የደብዳቤው መግቢያ ” የአባይ ግድብን በመገደብ ሀገራችን የጀመረቸውን የልማት አቅጣጫ ፈጣን እና እውን ለማድረግ በሚያደርገው እንቅስቃሴ የኢትዮጵያ ህዝቦች በውጭም ሀገር በአገር ውስጥ የሚገኙ ቀፏ እንደተመታ ንብ በመንቀሳቀስ የራሳችን አሻራ ያረፈበትን ግድብ መንግስት ካለንበት ድህነት እንላቀቃለን በማለት በየአቅጣጫው ርብርብ እየተደረገ መሆኑ ግልጽ ነው። ስለዚህ ቀና ሀሳብ አይደለም የሰው ልጅና መልአክ፣ ሰይጣንም ግዴታ አለብኝ ብሎ ሳይሳተፍ አይቀርም። በመሆኑም በአገራችን የሚገኙ ብሄር ብሄረሰቦች ተቃዋሚ ፓርቲዎችም ቢሆኑ የልማቱ ጉዳይ የህልውና ጉዳይ መሆኑን ተቀብለው የጋራ አሻራ ለማኖር እየተንቀሳቀሱ ነው።”
ደብዳቤው በማያያዝም ” የመስሪያ ቤታችን ሰራተኞች ቃል ከገቡት የኢትዮጵያ ዜጎች አንዱ ናቸው፣  ከእነዚህ ውስጥ ሁሉም ያለንበትን ሀገራዊ ግዴታ ሊወጣ የእጅ አሻራውን በደሞዙ አማካይነት እያሳረፈ ነው። ነገር ግን የመስሪያ ቤታችን ባልደረባ የሆኑት አቶ …ለአባይ ግድብ የተቆረጠውን ደሞዝ አላግባብ ስለሆነ ፈቃደኛ አይደለሁም እንዲመለስለኝ በማለት የተቀረውን ደሞዝ አልወስድም ብሎአል ሲል ገልጦ ” መንግስት ለሀገር ልማትና እድገት ያስቀመተውን አቅጣጫ ለማፍረስ እንደመንቀሳቀስ ስለሚቆጠር ከጸረ ልማት ሀይሎች ተለይቶ ስለማይታይ በልማት አደናቃፊነት እንደሚፈረጅ ጥርጥር የለንም።” ይላል።
ስለዚህ ይላል ደብዳቤው በመጨረሻም “የመንግስትን የልማት እንቅስቃሴ የህዝቡ የጋራ ተሳትፎ በጸረ ልማት ሀይሎች እንዳይደናቀፍ የአስፈጻሚ አካላት አስፈላጊውን የማስተካከያ እርምጃ እንዲወስድ አሳስባለሁ።”
ይህ ደብዳቤ የደረሳቸው በርካታ ሰራተኞች ከስራ መባረራቸውን፣ አንዳንዶች በእስራት መቀጣታቸውን፣ ሌሎች ደግሞ ደሞዛቸው መቆረጡን ለኢሳት ገልጠዋል። አሁንም ድረስ እየተዋከቡ እንደሚገኙ የገለጡት ሰራተኞች በዚህ አቋማችን ብቻ ከስራችን ተባረን ቤተሰቦቻችንን ለአደጋ አጋልጠን እንገኛለን ሲሉ ተናግረዋል።
መንግስት የኢትዮጵያ ህዝብ በፈቃደኝነት ለአባይ ግድብ መዋጮ እየከፈለ መሆኑን በተደጋጋሚ ቢገልጥም፣ በመሬት ላይ ያለው እውነታ ግን ከዚህ ይለያል። ቦንድ ለመግዛት አቅም የለንም ያሉ አርሶአደሮችም በልማት አደናቃፊነት ለእስር እየተዳረጉ ነው። በአማራ ክልል አዲስ የተጣለውን 500 ብር ቦንድ ለመግዛት የተሳናቸው አርሶአደሮች፣ ከብቶቻቸው ሳይቀር እየተነዳ ለእስር እየተዳረጉ ነው።
በቅርቡ በሀብት ደረጃው የተሻሉ የሚባሉት የግንባታ ተቋራጮች ለቦንድ ግዢ ቃል የገቡትን አንድ አስረኛውን ያክል እንኳ አለመክፈላቸው መዘገቡ ይታወሳል። ትለቅ ተስፋ የተጣለባቸው ሼክ ሙሀመድ ሁሴን አላሙዲንም ተጭበርብሬአለሁ በሚል ለቦንድ ግዢ ቃል የገቡትን ክፍያ አብዛኛውን ገንዘብ አላስገቡም።

መለስ እግዜር ይማርዎት፤ ግን አይመስለኝም! (አቤ ቶኪቻው)

ይህ ፎቶግራፍ የተወሰደው “የበፍቄ አለም” ከተባለው ከወዳጃችን በፍቃዱ ብሎግ ነው። ፍቄ ምስጋናህን እንካ…!

ታድያስ አቶ መለስ ዛሬ እንኳ ልፅፍልዎ አላሰብኩም ነበር። አንድ የሚያበሳጭ ዜና አንብቤ እርሱን ልነግርዎ፣ እግረ መንገዴንም እግዜር ይማርዎ ልበልዎ ብዬ ነው፤
ሰሞኑን ባለፈው በምርጫ ዘጠና ሰባት ግዜ የታየብዎ አይነት ህመም ድጋሚ አገርሽቶብዎ ቤልጄም ብራሰልስ ሊታከሙ እንደሄዱ ሰማሁ። በልቤም እግዜር ይማራቸው ስል አሰብኩ። ነገር ግን በአገሬ መሬት በእርስዎ ቆራጥ አመራር እና በድርጅታችን ፈፃሚነት የሚከናወነውን ነገር ሳይ፤ እግዜር ይማራቸው ማለቴን እግዜሩ ቢሰማ “ተው… በስራዬ አትግባብኝ” ብሎ የሚገስፀኝ መሰለኝ! እንዴት ካሉኝ ለዚህ የሚሆን አንድ ማሳያ ከወደ ስር አቀርባለሁ። ከቸኮሉም ሌላውን ዘለው የመጨረሻውን አንቀፅ ማንበብ ይችላሉ። (ግን የት ይሄዳሉ… ለራስዎ በእግዜር እጅ ተይዘው!)
የህመምዎ ነገር ድሮም የተፈራ ነው። እንኳንስ በአበበ ገላው ላይ ያደረው መንፈስ እንደዛ ቀልቦን ገፎት ይቅርና እንዲሁም በየ ግምገማው በሚደረግ እሰጣ ገባ በተለይ ህውሃት ለሁለት ከመሰንጠቋ በፊት በነበሩት ከበድ ከበድ ያሉ ግምገማዎች እነ አቶ ስዬ እና አቶ ገብሩ እንዲሁም ሌሎች ዛሬ ከድርጅቱ የወጡ ግለሰቦች በሚያደርሱብዎ ግምገማ ከአንዴም ሁለት ጊዜ ነፍስዎን ስተው ነበር እየተባለ ሲወራ ሰምቻለሁ። በርግጥ እውነት መሆኑን ምሎ ያረጋገጠልኝ ባይኖርም “እሳት ሳይኖር ጭስ አይፈጠርም” በሚለው አባባል መሰረት ነገሩ እውነት ሊሆን እንደሚችል ጠርጥሪያለሁ።
ያኔ በዘጠና ሰባቱም ምርጫም አቶ በረከት ስምዖንን ጨምሮ በርካታ አመራሮች ለአደገኛ የእራስ መቃወስ ህመም ተዳርጋችሁ እንደነበር ውስጥ አዋቂዎች ተናገረዋል። እንደውም የዛን ጊዜ ሁሉም በየጎጆው “አነዚህ ሰዎች አመራራቸው የተቃወሰው ለካስ ወደው አይደለም” ብሎ ከንፈሩን መጧል። የአቶ በረከትን በሚመለከት በቅርቡ መፅሀፋቸው የተመረቀ ጊዜ ሼክ ማህመድ አላሙዲን “እያንጠለጠልኩ ወስጄ አሳክመው ነበር” ብለው ነግረውናል። እንግዲህ የእርስዎ መፅሀፍ ደግሞ ሲታተም ማን እያንጠለጠለ ወስዶ ሲያሳክምዎ እንደነበር እንሰማ ይሆናል።
እኔ የምልዎ የአቶ በረከት ስምዖንን መፅሀፍ አይተው እርማት እንደሰጡ ሲነገር ሰምቼ ነበር… እውነት እርሶ አይተውት ነው ያሁሉ የሚያስተዛዝብ ነገር የተገኘበት…? እውነትም ሁላችሁም ታማችኋል ማለት ነው። እና እግዜር ይማራችሁ ብዬ እመርቃለሁ…! ግን አይመስለኝም። ለምን አይመስለኝም…?
ለምሳሌ ዛሬ እንዴት ያለ ኮሚክ ዜና ሰማሁኝ መሰልዎ…! “ዘ ዲክታተርስ” የሚለው የፈረንጅ ፊንም በኢትዮጵያ ሲኒማ ቤቶች እንዳይታይ ታገደ የሚል።
እውነቴን ነው የምልዎ ይሄ በጣም አሳዛኝ ዜና ነው።
ወይ ካድሬዎችዎ መንግስታችንን በጣም እያስፎገሩት ነው። ወይም ደግሞ እርስዎ ራስዎ ለይቶልዎታል።  እስቲ አሁን “ዘ ዲክታተር” ፊልምን ማገድ ማለት ምን ማለት ነው? እርግጥ ነው ሌላ ሰው ፊልሙን ከእርስዎ እና ከመንግስታችን ጋር ማመሳሰል ከጀመረ ቆይቷል። ነገር ግን እራሳችን በራሳችን “ፊልሙ እኛን የሚነካ ነው” ብለን ማገዳችን በእውነቱ ምህረት የማያሰጥ ወንጀል ነው። እንዲህ ስልዎ ለፊልም ተመልካቹ ተቆርቁሬ አይደለም። ከፈለጉ ልማልልዎ! ለድርጅታችን ተጨንቄ ነው። ይህ ፊልም እንዲታገድ ሲደረግ ትዕዛዝ ያስተላለፈው ግለሰብ “ድርጅታችንን እና እርስዎ መሪያችንን ሙልጭ አድርጎ ሰድቧል በድሏልም።” ብዬ ልናገር ነበር፤ ነገር ግን በአገሪቷ ካለ እርስዎ ቀጭን ትዕዛዝ የሚከናወን ነገር እንደሌለ ትዝ ሲለኝ እንደሚከተለው አሰብኩ፤
የተሰዉ ታጋዮች “አምባገነንነትን ለማጥፋት ነው የተሰዉት!” እያልን ለበርካቶች እንዳላስተማርን ዛሬ “ይህ ፊልም እኛን ይመለከታል” በሚል ስናግድ ራሳችንን በራሳችን “አምባ ገነነን ነን!” ብሎ የማወጅ ያህል ነው።  እኔ ግን የምልዎ እሺ ድርጅቷን ተዋት፣ ታጋዮቹንም እርሷቸው ግን የተሰዉ ታጋዮች አምላክ፤ የላይኛው እግዜር  ያን ሁሉ መስዋትነት ውሃ ሲያስበሉት አይቶ ምህረት የሚያደርግልዎ ይመስልዎታል…? እኔ ግን አይመስለኝም። ለማንኛውም እግዜር ይማርዎ!

ከኣዲ ዳኣሮ በሮ በሮ…

ዳዊት አበበ / ኦስሎ ኖርዌይ

የሚሚ ስብሃቱንና ዉሪዎቿን የጠረቤዛ ዝርጥጫ ዉይይት ካደመጥኩ በኋላ ሁለት ነገሮች ወደ አይምሮዬ  መጡ ፡፡ አንድም የዉሻን ባህሪ መመርመር ፣ በሌላ በኩል ደግሞ የአበበ ገላውን ማንነት መፈተሽ ፡፡
ከውሻ ባህሪ ልነሳ ! ፡፡ ስለዉሻ ባህሪ ይህንን ስፈትሽ አገኘሁ ፡፡

Dogs bond with the person who feeds them & interacts with them most.

“Loyalty” is a human concept. Dogs do not think in terms of “loyalty”….they think in terms of, “Who’s got my food? Who’s going to pet me?” They are opportunistic animals and largely form attachments with people who offer the most “benefit”….be it food, work or attention that they desire.

አዎ ! ታማኝነት ለሰው ልጅ የሚሰጥ ባህሪ ነው ፡፡ ዉሻ ደግሞ ተአማኒነት የሚል የሰው ልጅ ምግባር ሳይሆን ያለው ! የሱ ታማኒነት የሚገለጸው በሆዱ ብቻ ነው ፡፡ ጌታውን የሚያውቀው ፣ ሆዱን እስከሞላለት ድረስ ብቻ ነው ፡፡ ዉሻ የአድርባይነት ባህሪ የተላበሰ ፥ ጥቅሙን እስከ-አሟሉለት ድረስ ብቻ ጭራውን የሚቆላ እንስሣ ነው ፡፡
‘’ ሚሚ ስብሃቱ የማሽላ ሳቅ እየሳቀች ‘’ በዝርጥጫ ጠረቤዛዋ ላይ የሰበሰበቻቸውን  ‘’ችሎ ማደሮች’’ ! ማስለፍለፍ ጀመረች ፡፡የአህያዋ ፍልስፍና እኮ ነው ! እኔ ከሞትኩ… እኔ ! እኔ ! የተስፋ መቁረጥ ! የግባተ መሬት … ቢሞቱ ስልጣን አይዟት አለች እርር እያለች ፡፡
‘’ ቤን ‘’  ጃስ ! ስትለው ! ችሎ ማደር ቀጠለ ! አቶ መለስ ደንግጠው ነበር አሉ ? አቶ መለሰን አያውቋቸውም ነበር ማለት ነው ? መድፍ ሲያገላብጡ የነበሩ ሰውየ ስማቸው ሲጠራ ዞር ስላሉ ! ሚሚ ስብሃቱ በማሽላ ሳቅ ተብሰከሰከች ! በጌታዋ እጢ መውደቅ እያረረች ፡፡ ቤን ቀጠለ ! አንዳንድ ጊዜ ሪያሊቲን እንወቅ ! የመድፍ ጀርባ ተደግፈው መጽሃፍ ያነቡ የነበሩ ሰውን አበበ በሚሉት ሰው ይደነግጣሉ ብሎ ማለት ዘበት ነው ፡፡ ደግሞ ዳግማዊ ቴዎድሮስ እያሉ ሲጠሩት አለ…. ችሎ ማደር አንድ ፡፡ ችሎ ማደሮች ተራ በተራ ቀጠሉ ፡፡
አንድ ጊዜ ስዩም መስፍንን ዲሲ ውስጥ በቦክስ መትቶት የነበረው ሰው ቀጠለ ፡፡ አሁን የክፍያ ረብጣ ስለዘነበለት ፣ ከሰዉነት ወደ ችሎ ማደርነት የተለወጠው ሰው ያቅሙን ተንደፋደፈ ፡፡ ሚሚ ተሳለቀች ! ለወጭቷ አደረች ፡፡ ለተሰፈረላት ድርጎ የውሻ ጩኽቷን ጮኽች ፡፡ ትንሽ የስኒ ማዕበል ፈጥራ ! ለቤተ መንግሥት ለተቀኘችው ቅኔ ፟- የታክስ ማስቀነሻ የከተፎ ሥራ ሠራች ፡፡እንደሠራ አይገድል አሉ እማማ ሸዋረገድ ገድሌ !
የአቶ መለስ ጀግንነት በዶክተር  አረጋዊ በርሄ ሲፈተሽ !
ሲሳይ አጌና እየኮረኮረ ጠየቃቸው ፡፡ ዶክተር አረጋዊ የመለሰን የጦር ሜዳ ውሎ ወደኋላ ሄደው አስታወሱ ፡፡ መለስ ! ‘’ኮዳ ትራሱ ’’ ሳይሆን ጀርባው እንደ-አህያ በሸክምና በጀሪካል ውሃ መላላጡን ነው እኔ የማውቀው እንኳን የጥይት አረር ሊያቆስለው  አሉ ፡፡ ምን ማለት ነው ? አለ ሲሳይ ዝርዝሩን ለማግኘት ፡፡ በተላከበት በጀግንነት ሄዶ የማይመለስ  ! ገላው ያለቀ ነው በቅጣት አሉ፡፡ ቤን ! ይሰማል ?  እሳቸው እንኳን ታንክ ሊደገፉ   ጀሪካል ሲደፉ ነው የኖሩት ሰማህ ! ከአብሮ አደግህ አትሰደድ ነው ፡፡
አድዋ ባንክ እንዲዘርፉ ቢላኩ – በሸሽት ያፈተለኩ ! ሽሬ ኣዲ ዳኣሮ ‘ ላጥ ያሉ  እንደ ዶሮ ! ናቸው እንኳን መድፍ ሊያገላብጡ ፡፡ ይሰማል ሚሚ ስብሃቱ ?
የአበበ ገላውን ጀግንነትና ጋዜጠኝነት ለተጠረጠራችሁ የአቶ መለስ ‘’ ችሎ ማደሮች ‘’ !
ጊዜው የሠለጠነ ነው ! አንድ ጉግል የሚል መስመር አለ ! መጀመርያ የአንችን ስም አስገቢና ጎልጉል በይው፡፡ ሚሚ ሰሞኑን በአንድ ጸሃፊ መከሰስ እንዳለብሽ ከተጻፈ ጽሁፍ በስተቀር ስምሽና ገድልሽ ቢፈለግም አይገኝ፡፡ በየትኛው ሞራልሽ ነው የሚያበላሽን ጌታሽን ስም ለማዳን ስትይ ! የአበበ ገላውን የሙያ ብቃት ልትጠይቂ የቻልሽው ? ፡፡ እርግጠኛ ነኝ አሳዳሪ ጌታሽ እንኳ ሳያፍርብሽ የሚቀር አይመስለኝም ፡፡ አይ ! ቡቺ ! አበዛችው ! ጭራሽ አስፎገረቺኝ ሳይልሽም አይቀር፡፡ሳሙኤል ፍቅሬም ፥ ዮሴፍ ግዛቸውም፥ቢንያም ከበደም እንዲሁ እስቲ ገድላችሁን ዳሽ ውስጥ አስገቡና ፈትሹ ዳሽን ባንክ ውስጥ አላልኩም .. የምታገኙት መልስ -Dogs do not think in terms of “loyalty”….they think in terms of, “Who’s got my food? ነው፡፡

አቶ መለስ ዜናዊ የህክምና ምርመራ ለማድረግ ብራሰልስ ገቡ

ግንቦት ፴ (ሰላሳ) ቀን ፳፻፬ ዓ/ም

ኢሳት ዜና:-አቶ መለስ ዛሬ በቤልጂየም ዋና ከተማ ብራሰል የተገኙት በህክምና ቀጠሮዋቸው መሰረት ነው። በአእምሮ እጢ በሽታ እንደተጠቁ የሚነገርላቸው አቶ መለስ፣  ብራሰልስ የገቡት  የውጭ ጉዳይ ሚኒስትር ዲኤታ የሆኑትን አቶ ብርሀነ ገብረክርስቶስን አስከትለው መሆኑን ከኢምባሲ ምንጮች ያገኘነው መረጃ ያመለክታል።
አምባሳደር ብርሀነ ከአቶ መለስ ጋር የመምጣታቸው ምክንያት ቀደም ሲል ለ10 አመታት ብራሰልስ በነበሩበት ወቅት የአቶ መለስን ህክምና ያመቻቹ ስለነበር ቀረቤታ አላቸው በሚል ነው። አቶ ብርሀነ ገብረክርስቶስ የውጭ ጉዳይ ሚኒስትር ዴኢታ ሆነው ሲመደቡ፣ ዶ/ር ካሱ ኢላላ በእግራቸው እንዲተኩ የተደረጉት ለአቶ መለስ ባላቸው ታማኝነትና ህክምና ለመከታተል በሚመላለሱበት ወቅት ሚስጢር እንደሚጠብቁ ታምኖባቸው ነው።
አምባሳደር ብርሀኔ አምባሳደር ሆነው ብራሰልስ በነበሩበት ወቅት ይኖሩበት የነበረውን ቤት 360 ሺ ዩሮ በማውጣት በፈረንሳይ አገር በታወቁ የቤት ውስጥ ዲዛይነሮች አስውበው እንደነበረ ምንጮች ተናግረዋል።
የአቶ መለስ የጤና ሁኔታ ከቅርብ ጊዜ ወዲህ አሳሳቢ እየሆነ እንደመጣ ምንጮች ጠቁመዋል። አቶ መለስ ለመደበኛ ምርመራ በየሶስቱ ወሩ ብራሰልስ የግል ወይም ቻርተርድ አውሮፕላን ተከራይተው የሚመላለሱ ሲሆን ፣ የኢምባሲ ሰራተኞች እንኳ ስለ ጉዞአቸው ምንም አይነት መረጃ እንዳይኖራቸው ይደረጋል። ሆኖም ግን በኢምባሲው ውስጥ የሚሰሩ የተወሰኑ የአንድ ብሄር ተወላጆች አቶ መለስ ወደ ብራሰልስ ከማቅናታቸው በፊት  መረጃው አስቀድሞ እንደሚሰጣቸው የኢምባሲው ምንጮች ገልጠዋል። ከሁለት አመት በፊት የአቶ መለስን ብራሰልስ ለህክምና መመላለስ የግንቦት7 ራዲዮ በመዘገቡ ምክንያት አንድ የፊሊፒናዊ ዜግኔት ያላት የአምባሳደር ብርሀኔ ምግብ አዘጋጅና አንዲት ኢትዮጵያዊት የቤት ሰራተኛ ሚስጢር አሳልፋችሁ ሰጥታችሁዋል በሚል ተወንጅለው ከስራ መባረራቸው ተዘግቦ እንደነበር ይታወሳል።
አቶ መለስ ዛሬ ጠዋት ብራሰልስ ከገቡ በሁዋላ ሀኪማቸው ጋር እስከተገናኙበት ከሰአት በሁዋላ ድረስ ቀደም ሲል አምባሳደር ብርሀኔ ባሳደሱት ቤትና አሁን ካሱ ኢላላ በሚኖሩበት የአምባሳደሩ መኖሪያ ተኝተው እንደዋሉ ምንጮች ገልጠዋል። የአቶ መለስ በፍጥነት ወደ ብራሰልስ መምጣታቸውም ከሰሞኑተቃውሞ ጋር ሊያያዝ እንደሚችል ምንጮች ጠቁመዋል።
አቶ መለስ  ከጤናቸው ጋር በተያያዘ ከሶስት አመታት በሁዋላ ስልጣናቸውን ሊለቁ ይችላሉ የሚሉ ዘገባዎች እየቀረቡ ቢሆንም፣ ኢህአዴግ  አቶ መለስ በስልጣናቸው እንዲቀጥሉ ማስታወቂያ ማስነገር መጀመሩ የኢህአዴግን አባላት ሳይቀር ግራ እያጋባ ነው።
አቶ መለስ  በአእምሮ እጢ በእንግሊዝኛው አጠራር ብሬን ቲሞር በሽታ እንደሚሰቃዩ ይታወቅ እንጅ የበሽታው የአሳሳቢነት ደረጃ ምን ያክል እንደሆነ ለማወቅ ያደረግነው ጥረት አልተሳካም።
አቶ መለስ ከአምባሳደር ብርሀነ ገብረክርስቶስ ቀጥሎ ወዳጅ አድርገው የሚያቀርቡት ዶ/ር ካሱ ኢላላን እንደሆነ ይነገራል።
አቶ በረከት ስምኦንም በአእምሮ በሽታ እንደሚሰቃዩ ፣ ከምርጫ 97 በሁዋላ በደቡብ አፍሪካ ተገኝተው ህክምና ሲከታተሉ እንደነበር ይታወቃል። በቅርቡ ሼህ ሙሀመድ አላሙዲን አቶ በረከት በደቡብ አፍሪካ ህክምና ሲከታተሉ ወጪያቸውን እንደሸፈኑላቸው መናገራቸው ይታወሳል።

ባድመ ከተማ አቅራቢያ ከባድ የተኩስ ድምጽ እንደሚሰማና የቆሰሉ ወታደሮች በሃኪም ቤት መታየታቸውን ምስክሮች ገለጹ

ሰሜን ኢትዮጵያና ኤርትራ

ምስክሮችና ዘገባዎች በባድመ ትምህርት ቤት ተቃጥሏል ሲሉ፤ የወረዳው አስተዳዳሪ ሐሰት ብለዋል

በኢትዮጵያና ኤርትራ ሰሜን ምእራብ ድንበር ባድመ ከተማ አካባቢ የተኩስ ድምጽ መስማታቸውንና ቁስለኞች በሃኪም ቤት ሲታከሙ መመልከታቸውን አንዳንድ የአካባቢው ነዋሪዎችና፤ በአካባቢው አባላት እንዳላቸው የሚናገሩ የፖለቲካ ፓርቲዎች አስታወቁ።
ከሳምንት በፊት ኤርትራ 21ኛ የነጻነት ቀኗን ባከበረችበት እለት የኢትዮጵያ ጦር ድንበር ተሻጋሪ ጥቃት ማካሄዱን የኢትዮጵያ የመከላከያ ምንስቴር ምንጮችን ጠቅሶ የሪፖርተር ጋዜጣ የዘገበ ሲሆን፤ በዚህ ሳምንት ማብቂያ ደግሞ በባድመ የሚገኝ አንድ ት/ቤት መቃጠሉን ጋዜጣውና ቪኦኤ ያነጋገራቸው የአይን ምስክሮች ገልጸዋል። በከተማው አንድ አውቶብስ መቃጠሉም ተዘግቧል።
በኢትዮጵያና ኤርትራ ሰሜን ምእራብ ድንበር ባድመ ከተማ አካባቢ አዲ ኮከብና አዲ ድዓሮ ቀበሌዎች እንዲሁም በባድመ ከተማ አቅራቢያ ላለፉት ሁለት ሳምንታት በምሽት የከባድ መሳሪያ ተኩስ፤ እንዲሁም የነፍስ ወከፍ ጥይት ድምጽ እንደተሰማ አንድ የአካባቢው ሰው ለዝግጅት ክፍላችን ያዩትን ገልዋል።

የአይን ምስክሩ የተኩስ ድምጽ መስማታቸውንና ቁስለኞች በሃኪም ቤት ሲታከሙ መመልከታቸውን ለቪኦኤ ገልጸዋል።
ሳምንታዊው የሪፖርተር ጋዜጣ የመከላከያ የውስጥ ምንጮችን ጠቅሶ እንደዘገበው፤ የኢትዮጵያ ጦር ባለፈው ሳምንት ድንበር ተሻግሮ የሰነዘረው ጥቃት፤ አንድ ብርጌድ የኤርትራ ጦር ላይ ከፍተኛ ጉዳት ያደረሰ ነው ብሏል።። በጥቃቱ የሞቱ ሰዎች ቁጥር ባይታወቀም ከፍተኛ ወታደራዊ ባለስልጣናትን ጨምሮ ወታደሮች የተማረኩበት እንደሆነ ተጠቅሷል። በኢትዮጵያ በኩል የደረሰው ጉዳት አልተገለጸም።
ከዚህ ጥቃት በኋላ በተከታታይ የሚሰሙ የተኩስ ድምጾች እንዳሉ ምስክሩ ለቪኦኤ የገለጹ ሲሆን በባድመ ከተማ የሚገኝ አንድ ት/ቤት በከባድ መሳሪያ ተመቶ መቃጠሉን ገልጸዋል።
በዚህ ጉዳይ ላይ ከአዲስ አበባ የተሰጠ መግለጫ የለም። የኤርትራ የማስታወቂያ ሚንስትር አቶ አሊ አብዱ ለአሜሪካ ድምጽ ሬድዮ “በጉዳዩ ላይ አስተያየት ከመስጠት ተቆጥቢያለሁ” ብለዋል። የኢትዮጵያ መንግስት ቃል አቀባዮችን ለማግኘት ያደረግንው ጥረት አልተሳካም።
የታህታይ አዲ አቦ አስተዳዳሪ ለአከ ገ/እግዝሄር ከባድመ ከተማ ሆነው ለዝግጅት ክፍላችን በሰጡት መግለጫ፤ በባድም ከተማ የተቃጠለ ትምህርት ቤትም ሆነ አውቶብስ የለም ብለዋል።
የኢትዮጵያ ሰራዊት ድንበር ተሻግሮ በኤርትራ ጦር ላይ ጥቃት ሰንዝሯል በሚሉ ዘገባዎች እንዳነበቡ ገልጸው። በአካባቢው የሰሙት የተኩስ ወይም የውጊያ ድምጽ እንዳልነበረ ለአሜሪካ ድምጽ ሬድዮ ገልጸዋል።
የድንበር ተሻጋሪ ጥቃቶች ሁለቱን አገሮች በሚያዋስነው ሰፊ የ1ሽህ 500 ኪ.ሜ ድንበር አልፎ አልፎ ይከሰታል። በቅርብ ጊዚያት በአፋር በኩል በጎብኝዎች በሚዘወተር ስፍራ የደረሰውን ጥቃት የኢትዮጵያ መንግስት በኤርትራ ለሚሰለጥኑ ታጣቂዎች ኃላፊነቱን ሲሰጥ፤ ኤርትራ አስተባብላለች።
በቅርብ ጊዚያት ደግሞ በምእራብ በኩል በተከዜ ወንዝ ዙሪያ አነስተኛ የወርቅ ማእድን አውጭዎች መታፈናቸውን መንግስትና ተቃዋሚዎች ይገልጻሉ። አረና ትግራይ የተቃዋሚ ፓርቲ እንደሚለው ከ259 በላይ ሰዎች በኤርትራ መንግስት ታፍነው ተወስደዋል።
የአረና ትግራይ ፓርቲ ሊቀመንበር አቶ ገብሩ አስራት፤ ባለፈው ሳምንት ተካሄደ ስለተባለው የድንበር ተሻጋሪ ጥቃትና ስለ አፈናው የሚያውቁትን ለቪኦኤ ሲናገሩ
“ስለግጭቱ፣ ሻቢያ (የኤርትራ መንግስት) ጋር ስለሚደረገው ውጊያ ዝርዝር ነገር ያወቅንው ነገር የለም። አንዳንድ ሰዎች በአካባቢው የተኩስ ድምጽ እንደሚሰማና የተኩስ ልውውጥ እንዳለ ይናገራሉ” ብለዋል።

በደብረ ይድራስ ቅ/ጊዮርጊስ ተቃዋሚዎችን ለመበተን የተሰማራው ፖሊስ አስለቃሽ ጢስ ይዞ ቤተ መቅደስ ገባ

·        በአስለቃሽ ጢሱ ጸሎተ ቅዳሴው ታጉሏል፤ ሕፃናት፣ ምእመናንና አገልጋዮች ታፍነዋል::

·        ለውዝግቡ መፍትሔ ያፈላልጋል የተባለ ጥምር ኮሚቴ ተቋቁሟል::

·        ከ70 - 80 የሚደርሱ የደብሩ ሠራተኞችና ምእመናን እንደታሰሩ ናቸው::

·        ከንቲባ ኩማ ደመቅሳ ሊቀ ጳጳሱን በስልክ አነጋግረዋል::

በአዲስ አበባ ሀገረ ስብከት ኮልፌ ቀራንዮ ክፍለ ከተማ በሚገኘው ደብረ ይድራስ ቅዱስ ጊዮርጊስ ቤተ ክርስቲያን ከይዞታ ማስከበር ጋራ በተያያዘ ትናንት፣ ግንቦት 27 ቀን 2004 ዓ.ም ጠዋት በአጥቢያው ምእመናን መካከል ግጭት ተቀስቅሷል፤ በግጭቱ የአንድ ፖሊስ ሕይወት አልፏል፤ ስድስት ፖሊሶችና በርካታ ምእመናንም ተጎድተዋል፤ ብዙዎቹን የደብሩ ሰበካ ጉባኤ አባላትንና ሌሎች ሠራተኞችን ጨምሮ በቁጥር ከ70 - 80 የሚሆኑ የአጥቢያው ወጣት እና አዛውንት ምእመናን ከየመንደሩ በፌዴራል ፖሊስ አባላት እየተሰበሰቡ መታሰራቸው ነው የተነገረው፡፡

ግጭቱ እየቀጠለ በነበረበት ኹኔታ ለጸሎተ ቅዳሴ የተሰበሰበውን ሕዝብ ለመበተን በሚል ፖሊስ ወደ ቤተ መቅደሱ ዘልቆ በመግባት አስለቃሽ ጭስ መጠቀሙ ተመልክቷል፤ በዚህም በመካሄድ ላይ የነበረው ጸሎተ ቅዳሴ ታጉሏል፤ ለቍርባን የተዘጋጁ ሕፃናት፣ ሌሎች ምእመናንና አገልጋዮችም በጭስ የመታፈን አደጋ ደርሶባቸዋል፡፡ የሕንጻ ቤተ ክርስቲያኑ በሮችና መስኰቶች መንሥኤው ለጊዜው ባልታወቀ ኹኔታ የተበሳሱና የተሰባበሩ ሲሆን የደብሩ አስተዳደር ቢሮዎች፣ የጥምቀተ ክርስትና ቤትና ሌሎችም በሮች “የተደበቁ ሰዎችን ለማሰስ” በሚል መዝጊያዎቻቸው እየተሰበረ ፍተሻ እንደተካሄደባቸው ተገልጧል፡፡

ከንቲባ ኩማ ደመቅሳና ‹የፓትርያሪኩ ልዩ ሀገረ ስብከት› በሚል ከሚታወቀው የአዲስ አበባ ሀገረ ስብከት የረዳት ሊቀ ጵጵስና ሓላፊነታቸው እየለቀቁ ያሉት ብፁዕ አቡነ ቀውስጦስ በጉዳዩ ላይ በስልክ መነጋገራቸው ተሰምቷል፤ በግጭቱ አንድ ፖሊስ መሞቱንና ሌሎች ስድስት አባላት መቁሰላቸውን የተናገሩት ከንቲባ ኩማ የታሰሩት ምእመናን እንዲፈቱ ብፁዕ ሊቀ ጳጳሱ ያቀረቡላቸውን ጥያቄ እንዳልተቀበሉ ተሰምቷል፡፡

በአሁኑ ወቅት የደብሩ የክብረ በዓል (ንግሥ) እና መስቀል ደመራ ሥፍራ የነበረውን ይዞታ የቀበሌ 06 ጽ/ቤት (የኮልፌ ቀራንዮ ክፍለ ከተማ) ለመከለል የጀመረው ሂደት እንዲቆም ተደርጎ ውዝግቡን የሚያጣራ ኮሚቴ መቋቋሙ ተነግሯል፡፡ ኮሚቴው ከደብሩ ሰበካ ጉባኤ፣ ከአጥቢያው ምእመናን፣ ከክፍለ ከተማው አስተዳደርና ከአዲስ አበባ ከተማ ፖሊስ የተውጣጡ አባላት የሚገኙበት ነው፡፡

ግጭቱ ትናንት ጠዋት ከመቀስቀሱ ቀደም ብሎ የአጥቢያው አስተዳደር፣ አገልጋዮችና ምእመናን በፖሊስ ታጅቦ የመጣውን ግብረ ኀይል በባንዲራው እያሉ ሲማፀኑ ነበር፤ እነርሱ ራሳቸው ይዞታቸውን ለማስከበር በተደጋጋሚ ሲያመለክቱበት የቆዩበትና አሁንም ከፓትርያርኩ ጋራ እየተነጋገሩበት በመኾኑ ግብረ ኀይሉ ወደ ርምጃ ከመግባቱ አስቀድሞ ሁለት ቀናት እንዲሰጣቸው ሲጠይቁም እንደ ነበር ተዘግቧል፡፡

ምእመናኑ የኢትዮጵያን ሰንደቅ ዓላማ ይዘው ለሚያቀርቡት ተማጽኖ ቦታ ያልሰጠው ግብረ ኀይሉ ግን አጥሩን ወደ ማፈራረስና ችካል ወደ መቸከል ተግባር በመግባቱ ምእመናኑ ርምጃውን ድንጋይ በመወርወር ሲከላከሉ የአድማ ብተና ፖሊስ ደግሞ በቆመጥና በአስለቃሽ ጭስ ምእመናኑን ለመበተን መሰማራቱ ተገልጧል፤ ጥይትም ተተኩሷል፡፡ የችካል ምልክቱ የሚያርፍበት ቦታ ከዐውደ ምሕረቱ ያለው ርቀት ከኀምሳ ሜትር እንደማይበልጥ የዐይን እማኞች ተናግረዋል፡፡ የደብሩ አስተዳደር በዚህ ይዞታው ላይ በአንደኛ ደረጃ ት/ቤት ግንባታና በሌሎችም ትልሞች የራሱን የራስ አገዝ ልማት ዕቅዶች ለማካሄድ ሲንቀሳቀስ እንደ ነበር ለመረዳት ተችሏል፡፡

በአሁኑ ወቅት በአዲስ አበባ ሀገረ ስብከት የሚገኙ በርካታ አድባራትና ገዳማት የይዞታ ማረጋገጫ ካርታ እንዳገኙ ተዘግቧል፡፡ በአንዳንዶቹም÷ ለአብነት ያህል በኮተቤ ደብረ ልዑል ቅዱስ ገብርኤል÷ የቤተ ክርስቲያን ይዞታ ለግለሰብ ጥቅመኞችና ለፕሮቴስንታቶች በመሰጠቱ የወረዳው ፖሊስ ጽ/ቤት የየካ ክፍለ ከተማ ችግር ከመፈጠሩ በፊት በጉዳዩ እንዲያስብበት ያቀረበው ጥያቄ ይገኝበታል፡፡

በደብረ ይድራስ ቅዱስ ጊዮርጊስ ቤተ ክርስቲያንም የትናንቱ ችግር በተዘገበው ደረጃ እንዲባባስ ያደረገው አሁን እስከ ዐውደ ምሕረቱ የዘለቀው የይዞታ ነጠቃ ብቻ ሳይሆን የቀበሌው ጽ/ቤት ቀደም ብሎ የደብሩ ካህናት መኖሪያ ቤት ተሠርቶበት የነበረውን ቦታ በመውሰድ ኮንዶሚኒየምና የቀበሌ ጽ/ቤት ሲሠራበት በዝምታ በመታለፉ መሆኑን አስተየየታቸውን ለዜና ሰዎች የሰጡ የሰበካው ምእመናን ገልጸዋል፡፡

በኮልፌ ቀራንዮ ክፍለ ከተማ (ከፍተኛ 24 ቀበሌ 14 59 ቁጥር ማዞርያ) አውግስታ ሸሚዝ ፋብሪካ አካባቢ የሚገኘው የደብረ ይድራስ ቅዱስ ጊዮርጊስ ቤተ ክርስቲያን ከ23 ዓመት በፊት፣ በ1981 ዓ.ም የተመሠረተ ደብር ነው፡፡

ይድራስ የዱድያኖስ ጭፍሮች የሊቀ ሰማዕታት ቅዱስ ጊዮርጊስን ዐፅም አቃጥለውና ፈጭተው የበተኑበት ተራራ ስም እንደ ኾነ ይታወቃል፡፡

የኤርትራ ጦር በባድመ አንድ ትምህርት ቤትና አንድ አውቶብስ አቃጠለ

Wednesday, 06 June 2012 09:21
By Yemane Nagish

የኢትዮጵያ ሠራዊት በቅርቡ በባድመ ግንባር የኤርትራ ግዛት ውስጥ በመግባት በሦስት ወታደራዊ ካምፖች ላይ ጥቃት ማድረሱን ተከትሎ፣ የኤርትራ ጦር በባድመ ውስጥ የሚገኘውን አንደኛ ደረጃ ትምህርት ቤትና አንድ አውቶብስ ማቃጠሉን ምንጮች ጠቆሙ፡፡ የአካባቢው የሪፖርተር ምንጮች እንደገለጹት፣ ባለፈው እሑድ ከቀኑ ዘጠኝ ሰዓት በባድመ ግንባር የሚገኘው የኤርትራ ጦር ኃይል በከባድ መሣርያ (ተወንጫፊ) ባደረሰው ጥቃት፣ ‹‹ባድመ ቀዳማይ ብርኪ ቤት ትምህርቲ›› (ባድመ አንደኛ ደረጃ ትምህርት ቤት) ሙሉ ለሙሉ በመቃጠሉ ከጥቅም ውጪ ሆኗል፡፡ ትናንት ደግሞ በከተማዋ ውስጥ ቆሞ በነበረ አንድ አውቶብስ ላይ በተመሳሳይ በደረሰው ጥቃት ሙሉ ለሙሉ ተቃጥሏል፡፡ በሁለቱም ጥቃቶች በሰው ላይ የደረሰ ጉዳት የለም ተብሏል፡፡

የኢትዮጵያ መከላከያ ሠራዊት ኤርትራ የነፃነት በዓል በማክበር ላይ ሳለች ድንበር ጥሶ በመግባት በባድመ ግንባር በሚገኝ አንድ ብርጌድ ላይ ጥቃት ያደረሰው፣ ከዚያ ቀደም ሲል የኤርትራ ጦር የኢትዮጵያን ድንበር ጥሶ በመግባት በባህላዊ መንገድ የወርቅ ማውጣት ሥራ ላይ የተሰማሩ ኢትዮጵያውያንን በተደጋጋሚ እያፈነ በመውሰዱ ምክንያት ነው፡፡

ባለፈው ዓመት በኤርትራ ላይ ያለውን ፖሊሲ ‹‹ከመከላከል ወደ ተመሳሳይ ዕርምጃ መውሰድ›› የለወጠው የኢትዮጵያ መንግሥት፣ በአፋር አካባቢ በኢትዮጵያውያንና በአውሮፓውያን ቱሪስቶች ላይ ከኤርትራ በኩል ጥቃት በመሰንዘሩ አፀፋ ወታደራዊ ዕርምጃ መውሰዱ የሚታወስ ነው፡፡

ግንቦት 20ን ለማክበር 120 ሚሊዮን ብር መውጣቱ ተጠቆመ

ኢህአዴግ 21ኛውን የግንቦት 20 በዓል ለማክበር ከፍተኛ ገንዘብ ማውጣቱን የውስጥ አዋቂ ምንጮች ለዝግጅት ክፍላችን ገለጹ፡፡ ምንጮቹ እንደሚሉት ኢህአዴግ በዓሉን ለማክበር ከ120 ሚሊዮን ብር በላይ አውጥቷል፡፡ ምንጮቻችን አክለውም “በዓሉ በየአባል ድርጅቶቹና በየመሠረታዊ ድርጅቶች እንዲከበር ተደርጓል፡፡ በዝግጅት ላይም የጋባዥና ተጋባዥ ኮሚቴ ተዋቅሮ በጀት ተመድቦ ሲሰራ ቆይቷል፡፡ በዚሁ መሠረት በዓሉ በገንዘብ ብዛትና ለጥቅም ሲባል በተሰበሰቡ ሰዎች እንጂ በዓሉን በእምነት አላከበሩም፡፡” ብለዋል፡፡ አያይዘውም በተለይ የኦሮሚያ የግንቦት 20 በዓል የተከበረው በከፍተኛ የገንዘብ ወጪ እንደሆነ ይገልፃሉ፡፡ እነዚህ ታማኝ የዜና ምንጮች እንደሚሉት “ሰዎችን ጋብዞ ላመጣ አንድ ሺ ብር፣ ለፎረም አባል 600 ብር፣ ለቀበሌ ቀስቃሽ 300 ብር፣ ለሰልፈተኛ መቶ ብር እየተከፈለ የተሰበሰበ ነው፡፡ ለዚሁ ማስፈፀሚያ የሚውል ለኦሮሚያ ብቻ 30 ሚሊዮን ብር መመደቡን” ያስረዳሉ፡፡ እነዚህ የውስጥ አዋቂዎች እንደሚሉት “ግንቦት 20 እንዲከበር ከፍተኛ ገንዘብ ቢወጣበትም ተሰብሳቢዎች ከጊዜ ወደ ጊዜ ሥርዓት እየሆነ በመጣው ሙስና፣ የመልካም አስተዳደር እጦትና ኦሮሚያ ከሞግዚት አስተዳደር አለመውጣት ቅሬታ ሲያሰሙ ተደምጧል፡፡ እንዲያውም ለሥራ ነው እንጂ ኦሮሚያ መኖሬ፣ የከፋኝ ዕለት እማ ትግራይ ነው አገሬ” የሚል ግጥም ሲነገር መደመጡን በሥፍራው የነበሩት ምንጮቻችን ገልፀዋል፡፡ በሌላ በኩል ግንቦት 20 በዓል ማለዳ ላይ በመስቀል አደባባይ ለማክበር የተደረገው ጥረት አለመሳካቱን ሪፖርተራችን ዘግቧል፡፡ በዕለቱ እስከ ሦስት ሰዓት ድረስ በመስቀል አደባባይ የነበረው ህዝብ ከ300 ሰው የማይበልጥ ሲሆን እነሱም “አቶ መለስ ይመጣሉ ውጡ ተብለን መተን በፀሐይ ያስደበድቡናል” በማለት ተበሳጭተው ተበትነዋል ሲል ዘግቧል፡፡ መንግስት ለቦንድ ግዢ የሰራተኞችን አቅም ያላገናዘበ የግዳጅ ሽያጭ እያደረገ ባለበት ወቅት ስልጣን የያዘበትን ቀን ለማክበር ለአንድ ቀን ይህን የሚያክል ወጪ ማውጣቱ አነጋጋሪ ሆኗል፡፡

በቤንች ማጂ ዞን በመቶዎች የሚቆጠሩ ሰዎች ተገደሉ - ግጭቱ አሁንም አልበረደም

 በቤንች ማጂ ዞን ሜኒኑ፣ ጉልዲያ፣ ሜኒትሻሻ፣ ቤሮ፣ እሹርማ እና በኮይ ወረዳዎች ለወራት የቀጠለው ግጭት ዳግም ማገርሸቱን የአካባቢው ምንጮች ጠቆሙ፡፡ በተለይ የፌደራል ፖሊስና የመከላከያ ሰራዊት በጥምረት በሚቆጣጠሯቸው ኮይ እና ቤሮ ሻሻ አካባቢዎች ከፍተኛ የፀጥታ ችግር እንዳለ የሚናገሩት ምንጮቻችን ግጭቱ ያገረሸው ግንቦት 12 ቀን 2004 ዓ.ም በአካባቢው ቢራ እና ለስላሳ የሚያከፋፍሉ አቶ አብርሃም የተባሉ ግለሰብ በአካባቢው በሚንቀሳቀሱት ታጣቃዎች መገደላቸውን ተከትሎ እንደሆነ ዘግበዋል፡፡ ፍኖተ ነፃነት ያነጋገረቻቸው አንድ የዞኑ ባለስልጣን በአካባቢው አሳሳቢ የሆነ የፀጥታ ችግር እንዳለ አምነው፣ ችግሩ ከአራት ወራት በላይ እንዳስቆጠረ ተናግረዋል፡፡ እኚሁ የዞኑ ባለስልጣን ጨምረው እንደ ገደለፁት ካለፉት አራት ወራት ወዲህ መኪናዎች ወደ ተለያዩ የወረዳ አካባቢዎች ሲንቀሳቀሱ በመንግስት ታጣቂዎች እንደሚታጀቡ አብራርተዋል፡፡ ባለሥልጣኑ እንደሚሉት የዞኑ የፀጥታ ችግር ከቁጥጥር ውጪ በመውጣቱ በአካባቢው የሚገኙት የፌደራል ፖሊስና የመከላከያ ሠራዊት አካላት እርምጃ በመውሰድ ላይ ይገኛሉ፡፡

የፍኖተ ነፃነት ምንጮች ባደረጉት ማጣራት እንደሞከሩት የፌደራል ፖሊስና የመከላከያ ሰራዊት ከመጠን ያለፈ ኃይል ተጠቅመው አካባቢውን ለማረጋጋት ሞክረዋል፡፡ ምንጮቻችን በዚህ የኃይል እርምጃ በመቶዎች የሚቆጠሩ የአካባቢው ነዋሪዎች እንደተገደሉ አስረድተዋል፡፡ ግጭቱ ከተባባሰባቸው አካባቢዎች ሸሽተው የወጡ ነዋሪዎች ለምንጮቻችን እንደገለፁት በየቀኑ ከአስር እስከ አስራ አምስት ሰዎች በግጭቱ ይገደላሉ፡፡ በአካባቢው የሚወጣውን የወርቅ መአድን ለመቆጣጠር የሚፈልጉ ከ15 በላይ የሚሆኑ ታጣቂ ሀይሎች በዞኑ ውስጥ እንደሚንቀሳቀሱ ከአካባቢው ያሰባስብናቸው መረጃዎች ይጠቁማሉ፡፡ በተያያዘ ዜና በአካባቢው ያገረሸውን ግጭት ተከትሎ ከሚዛን ከተማ ወጪ ባሉት የዞኑ አካባቢዎች የስልክ ግንኙነት መቋረጡ ታውቋል፡፡ ከግንቦት 18 ጀምሮ የተቋረጠው የስልክ ግንኙነት በአካባቢው ያለውን ግጭት አደገኛነት የሚጠቁም መሆኑን የአካባቢው ምንጮች ጠቁመዋል፡፡ ፍኖተ ነፃነት ስለ ግጭቱ መንግስት የሚያቀው መረጃ እንዳለ የተጠየቁት የመንግስት ኮሙኒኬሽን ጉዳዮች ጽ/ቤት ምክትል ኃላፊ አቶ ሽመልስ ከማል የደረሳቸው መረጃ እንደሌለ ተናግረዋል፡፡ ፍኖተ ነፃነት የክልሉ ቃል አቀባይ የሆኑትን አቶ ሀሰንን ለማግኘት ያደረገችው

ጥረት ስልካቸው ባለመስራቱ ምክንያት አልተሳካም፡፡