መትረየስና ጠመንጃ የሰረቁ በእስራት ተቀጡ

የአገር መከላከያ ሚኒስቴር የሎጀስቲክ ዋና መምሪያ ባልደረቦች ይገኙበታል

አንድ ብሬን መትረየስ እና አንድ ባለሰደፍ ጠመንጃን የሰረቁ ስምንት ግለሰቦች በፌዴራል ከፍተኛ ፍ/ቤት 15 ወንጀል ችሎት ከትናንት በስትያ ስምንት አመት በሚደርስ እስርና በገንዘብ መቀጮ እንዲቀጡ ፍርድ ቤቱ ውሳኔ አስተላለፈ። 1ኛተከሳሽ መቶ አለቃ ደረጀ ተስፋዬና 2ኛ ተከሳሽ መቶ አለቃ ዘመድኩን ገ/ዮሐንስ በአገር መከላከያ ሚኒስቴር በሎጀስቲክ ዋና መምሪያ የኦርድናንስ መምሪያ የናዝሬት ጦር መሳሪያ ዲፖ

የግምጃ ቤት ኃላፊዎች መሆናቸውን የክሳቸው ዝርዝር ያስረዳል። 3ኛ ተከሳሽም ሃምሳ አለቃ ዲጋሞ ደፌ በጥበቃ ስራ ላይ ተመድቦ የሚሰራ የሰራዊቱ አባል ሲሆን ተገቢ ያልሆነ ብልፅግና ለራሳቸው ለማግኘትና ለ4ኛ፣ 5ኛ፣ 6ኛ እና 7ኛ ተከሳሾች ለማስገኘት አስበው ነበር። 1ኛ ተከሳሽ ከ2ኛና 3ኛ ተከሳሽ ጋር በመመሳጠር በኃላፊነት ከሚቆጣጠረውና በአደራ ከተረከበው የጦር መሳሪያ ግምጃ ቤት ውስጥ የመለያ ቁጥር ኤ-ቢ 049 የሆነ አንድ ብሬን መትረየስ እና የመለያ ቁጥሩ 782288 የሆነ አንድ ባለሰደፍ ክላሽ ጠመንጃዎችን ፈታትቶ በማዳበሪያ ይጠቀልላል። ከዚያም የ3ኛ ተከሳሽ የጥበቃ ሽፍት ጊዜ በሆነበት ሐምሌ 22 ቀን 2004 ዓ.ም. ከምሽቱ 3፡00-4፡00 ሰዓት ባለው ጊዜ ውስጥ አውጥቶ ጠመንጃዎቹን

ለሚያሻሽጠው 4ኛ ተከሳሽ እንዲሰጥ ለ3ኛ ተከሳሽ ይሰጣል።

3ኛ ተከሳሽም ጠመንጃዎችን ከ1ኛ ተከሳሽ ተረክቦ የጦር መሳሪያ ዲፓ ከሚገኝበትና ከሚጠብቀው ካምፕ አጥር ውጪ አውጥቶ በማስቀመጥ 4ኛ ተከሳሽ ጠመንጃዎቹን ከደበቁበት ቦታ አንስቶ እንዲወስድ አድርጐ ነበር። 2ኛ ተከሳሽም ቀደም ሲል በሰው የተዋወቀውን 4ኛ ተከሳሽ የሚሸጥ የጦር መሳሪያ እንዲያፈላልግለት በነገረው መሰረት ከላይ የተጠቀሱትን ጠመንጃዎች 1ኛ ተከሳሽ እንዲሸጥለት በማሳመን መሳሪያዎቹ በ3ኛ ተከሳሽ አማካኝነት እንዲመጡ ያስደርጋል። ከዚያም 4ኛ ተከሳሽን በስልክ በመጥራት ጠመንጃዎቹን እንዲወስድ በማስደረጉ 4ኛ ተከሳሽም 2ኛ እና 3ኛ ተከሳሾች መሳሪያዎቹ ከተደበቁበት አንስቶ እንዲወስድ በስልክ ደውለው በነገሩት መሰረት ከላይ በተጠቀሰው ጊዜ ውስጥ ጠመንጃዎቹ ከተደበቁበት ቦታ አንስቶ በመውሰድ ናዝሬት ከተማ ቀበሌ 09 ክልል ውስጥ ከሚገኘው መኖሪያ ቤቱ ያስቀምጣል። በነጋታው ሐምሌ 23/2002 ዓ.ም. በግምት ከቀኑ 8፡00 ሰዓት ሲሆን ለ7ኛ ተከሳሽ ለማስረከብ እና ጠመንጃዎቹ የተሸጡበትን ዋጋ ብር 18000 ብር በመቀበል ከዚሁ ብር 16100

ብር ለ1ኛ ተከሳሽ፣ ለ2ኛ ተከሳሽ ደግሞ 2000 ብር መስጠቱን የሚያስረዳው ክሱ ነው። 1ኛ ተከሳሽ ሐምሌ 25/2002 ዓ.ም. ካምፕ ውስጥ 3ኛ ተከሳሽን በመጥራት ‹‹ድርሻህ ነው›› ብሎ 2000 ብር ሰጥቶታል። እንዲሁም 5ኛ እና 6ኛ ተከሳሾችም 7ኛ ተከሳሽ የጦር መሳሪያዎቹን

ጭኖ ከናዝሬት ወደ አዲስ አበባ የሚወስድ ተሽከርካሪ ይዘው እንዲመጡ በነገራቸው መሰረት ሐምሌ 23/2002 ዓ.ም. አንድ የቤት መኪና ከ8ኛ

ተከሳሽ ይኮናተራሉ። ቀጥሎም ተከሳሾች ናዝሬት በመድረስ የጦር መሳሪያውን ከ4ኛ ተከሳሽ ቤት አውጥተውና በልብስ ሻንጣ ጭነው ወደ አዲስ አበባ ሲመለሱ ቃሊቲ ፍተሻ ጣቢያ ላይ ለመያዝ ችለዋል። በሁለተኛ ክስ የተከሰሰው 8ኛ ተከሳሽ ብቻ ነበር፡፡ ተከሳሽም ከላይ የተጠቀሱት የጦር

መሳሪያዎች በሙስና ወንጀል ድርጊት የተገኙ ለመሆናቸው በቂ ምክንያት እያለው እንዳላወቀ በመምሰል በቃሊቲ ፍተሻ ጣቢያ ላይ እጅ ከፍንጅ

እስኪያዝ ድረስ አገባብ ላለው ባለስልጣን ሳያሳውቅ በመቅረቱ ክሱ ሊቀርብበት ችሏል፡፡ ፍርድ ቤቱም 1ኛ፣ 2ኛ፣5ኛና 6ኛ ተከሳሾች እያንዳንዳቸው በስምንት አመት ፅኑ እስራትና በ5000 ብር የገንዘብ ቅጣት እንዲቀጡ ውሳኔ ሲያስተላልፍ በሌሎቹም ላይ እንደወንጀላቸው

መጠን የፍርድ ውሳኔ ሰጥቷቸዋል፡፡